7. Русский хронограф ред. 1512 г. Глава 204
Редакция русского хронографа 1512 года является древнейшей редакцией хронографа, дошедшей до нас. В хронографе излагаются события всемирной и русской истории, причем известия русской истории постепенно вписываются в события всемирной истории. Русский хронограф являет собой воплощение идеи преемственности и главенства России во всемирной истории. Идеологическая формула Москва — третий Рим» нашла отражение в этом историческом памятнике. Текст хронографа состоит из 208 глав. Публикация осуществляется по изданию: Памятники литературы Древней Руси: Конец XV—первая половина XVI века. М., 1984. С. 404—412.
Глава 204. Великое княжение Серпьское
По Анкирьской убо брани, егда Темирь побѣди и ятъ и отведе царя Баозитаи вся его поплени, и сестру Стефанову, великаго князя серпьскаго, иже бѣ за Баозитомъ, князь же велики Стефанъ посылает къ Темирю послы и изволит ея от пленениа, сам же въ царствующий град приходить и с братом своим Волком и тамо от царя греческаго Мануила, еще живу ему сущю, деспотскый санъ приемлеть, и, мьного почтивъ его, отпусти.
Приходить же деспот Стефанъ и с братом своимъ во свои градъ Новоброд, град сребреный, воистину и златый. По убьении же Баозита царя свободися Серпьскаа земля от ярма и покорениа бесерменьска, и оттуле деспот Стефанъ самовластець и господарь всей земли серпьской бысть божиею милостию. И объходя землю отечества своего, инѣх смири, иная же себѣ покори, и елици въ прежнея времена гради и мѣста восхищени быша от серпьскиа власти, сих к себѣ приторже. Таже преходя, обрѣте Бѣлъград, егоже преже угри восхитиша, егоже ото Угорьскиа земля по смирению взят. Сей бо Бѣлъград аще и въ предѣлех серпьскых лежим есть, но яко на сердци и плещах Угорьскиа земля ляжа бяше. Таже и прочая грады своя, елици турки восхитиша самовластьно, взят.
Начат же множае пребывати въ Бѣлѣградѣ, занеже мѣсто града того зѣло красно, и морем и реками и пристанищи украшено, и отовсюду корабли к нему яко крилати со множеством благых прилетаху. Сего убо Стефан украсивъ стенами и царскыми полатами, паче же церковью соборною, и архиепископию създа, и всѣми потребами удовли, и в ней жилище иноком сотвори. Архиепископъ же той бѣлоградскыи, екъсархъ всей Серпьской земли. Създа же и церковь во имя чюдотворца Николы, и яко манастырь всѣми добрыми храминами и одры, и всѣми потребными удовливъ. И собра в ню множество больных и прокаженых, насади же и сады многы на прохлажение тѣм. Потом же изобрѣт мѣсто красно, пустынно и потребно млъчанию и созидаеть храм во имя Живоначалныа Троица, и всякими добрыми украсивъ и живописателным художеством, и град около и въ стенах келиа. Собра же и множество инокъ боголюбезных и всели ту, и всякими потребными удовли и сокровище день ото дни пологаше ту. Сътвори же себѣ и гробницу ту, идѣже малом последи положися. Дасть же и иконы ту, златом и бесерием украшены, и множество книгъ, и сосуды, и ризы съ великим бесериемь и златом украшены, яко превосходити и Святыя Горы великую Лавру, и свѣтилники златыа. Призываетъ же и патриарха Кирила со всѣм Серпьскыя земля собором и сътворяеть освящение храма въ день святыа Пятница. Нача же здати обитель в лѣто 6915. Приходит же и нищих множество, им же доволно милостыню подастъ, и повсегла сам нощию, по улицам града ходя, нищим одежа и златица подавая. И нѣхто единъ, многажды зашед, милостыню взят и, паки пришед, просяше. Он же давъ ему и рече: «Возми, татю и хишниче!» Он же отвѣща ему: «Не азъ, но ты тать и хишникъ, со здешним царством и будущее царство крадеши и восхищавши».
О мусулмане
По сих же царь Мусульманъ, сынъ первый царя Баозита, присылаеть къ деспоту Стефану, во еже мирный завѣтъ сотворити, еже и сътвори. Самъ же Мусулманъ въздвизашеся къ востокомъ отеческыа власти взыскати и брата своего Асъбѣга, гоня, убиваеть и страны восточныа себѣ покори и Турьческую страну. Серпьская же земля по сложении мира с Мусулманом пребываше во смирении. Но не бяше терпѣти таковая лукавому: подвиже убо брата его Волка, и взят у царя Мусулмана множество воиньства, яко: «Да дасть ми, — рече, — брат мой деспот Стефанъ половину отчины, и яз с нея тебѣ служю. Аще ли ни, и аз попленю и пусту сътворю ея». Деспот же Стефанъ не хотя стадо благочестивое, еже господь свободи, паки турком поработити. Волкъ же со агарены обътекоша всю землю, пленуюше и пожизаюше и изсѣцающе, яко дивни звѣрие; потом же второе приходить со множайшими. Стефанъ же не изыде противу им, да не крови братней причастникъ будеть, ово же и навѣта бояся оставших с ним, занеже всѣх Волкъ превещалъ бѣ къ себѣ ово обѣщаниемь даровъ, ово же и прещеньми, посылая посланиа къ сущим у деспота. Деспот же, держа посланиа его в руку в дому своем въ Бѣлѣградѣ, плакате пред образом Спасовымъ: «Вижь, Христе, — глаголаніе, — яко неправедно на мя поучаются, и отроци мои быша мнѣ предатели, яко же иногда твой ученикъ Июда, и соблюди до конца малое число оставъших у мене». Волкъ же со агаряны всю землю растлиша. Видѣв же Стефанъ сиа, раздѣляеть землю. Волкъ же служаше царю Мусолману с нетии своими, рекше с сестричичи, и тѣм отеческую землю дръжащим, Стефан же во отлученной ему части живяше.
О Миссии
По сих же брата Мусулманова Мисию призывает угровлашьсъкый держатель, пребывающу ему в сѣвернем востоце, и даст ему воиньство в помощь на брата его Мусулмана во отомщение свое. Посыласть же Мисиа и к деспоту Стефану и къ брату его Волку, да поидуть с ним, такоже и къ нетиемъ его. Мусулманъ же сложися съ греческым царемъ Мануилом и со фруги. Увидѣв же Мисиа, яко хощеть Волкъ бѣжати къ Мусулману, восхотѣ его убити, деспот же изручаеть его, он же в той ноши побѣже. Бывши же брани велицѣй, и побѣжаеть Мусулманъ Мисию. Мисиа же обрѣтает Волка в Филиповѣ градѣ и повелѣ его убити съ нетием его Лазаремъ. Таже ходя въслѣдъ брата своего разбойническы, и обрѣтаеть его вином упившася во Андриановѣ градѣ, повелѣ его удавити.
И начат Мисиа всѣми скипетры обладати и сотвори миръ с деспотом Стефаномъ, Стефан же пакы единъ самодержець бысть по всей земли Серпьской. Мисиа же царь многи страны поплени и вооружается на деспота Стефана, Серпьскую землю конечному потреблению предати. Расписа же и грады вельможамъ своимъ и прииде в лѣто 6921, и многи грады поплени и приатъ Больвинь, и Липовець, и Сталакъ, и Коприанъ. Сиа видѣвъ, деспот Стефанъ посылаеть восточному султану Махаметю, сыну Баозитову, меншему брату Мисиину, и сотвори с ним вѣру. II приходит Махаметь султанъ от востока, деспот же от запада, с ним же и угорьскыя воеводы и басаньскиа дръжателя. Мисиа же прииде в горы, хотя засѣщи путь, да нихто же убѣжить султановых и деспотовых вой. Деспот же Гурга, нетиа своего, отпусти с воиньством. И бывъши брани, побѣженъ бысть Мисиа и побѣже, и утопиша его в рецѣ.
О Махамете
Бысть же Махамет восточный и западный царь и всѣм турком, бяше же благъ и кротокъ. Приходить же и господинъ Гургъ, деспотъ же Стефанъ почтивъ его зѣло многими дарми, и благодаривъ бога о всем. И тишинѣ велицѣ бывши. Он же милостыни по обычаю прилежа, странных и прокаженых питая, или ото инокъ кого слыша в млъчании живуща, обилно потребная посылаше ему. Устави же чинъ и служащих ему: ови убо въ внутрених ему предстояху, с ними же бѣсѣдоваше о устроении своего царства, и повести дѣяше от писаниа и от слуха, и добрѣ царствовавших и власть правивших благочестивно подражати глаголаше, злых же уклонится, яко: «Путь, — рече, — нечестивых погибнет». Вторый же чинъ устави въ внѣшней храмине, иже от внутрь сущих приимаху повелѣниа его. Третий же чинъ, иже внѣ предстояху, и от средних посылаеми творити повелѣниа его. Отрече же ся конечно всяких игръ тимганьскых и мусикийскых: «Сиа, — рече, — во врѣмя брани прилична суть». Всѣм же служащим ему яко отець щедролюбивъ и елики убо неисправлениа ради смири и от начальства отстави, или кто невѣрьствиемъ своимъ погуби или неслужбою, или инѣм коимъ образом нищь бяше, сих отеческаго и дѣдняго и прадѣдняго мѣста не лишаше: «Ибо богъ, — глаголаше, — о согрешении двема отомъщении не казнить», — и согрѣшыиаго, яко нища, Соломоньски милуа. Вси же предстоящии ему другъ къ другу благоговѣиньство сохраняху, паче же ближнии его, и вопль и хула и смѣх или одежъ несопрятание и не именовашеся в них. К сим же и очи свои сохраниша от всякаго объзираниа, и никто же может ни от великих видѣти их. Се же чюднейше пръваго, яко и женьскою любовию не побѣжашеся.
Умре же нетий его Болша, арбанашьский господинъ, деспот же Стефан поиде и приатъ за себе арбанасы. И еще ему в той странѣ, прииде съ Угръ вь Бѣлъград Коньстянтинъ, сынъ Срацимира, царя балгарьскаго, и ту умирает в Белѣградѣ в лѣто 6930.
Султанъ же Махаметь, сынъ Баозита царя послѣдний, поживе во смирении, с коими изначала любовь положи, и умирает во Андриановѣ градѣ. Понужаху же деспота Стефана мнозии от его области, еже взыти ратию и приати страны его, он же рече: «Клятву положих къ султану, еже дѣтем его добро сътворити». Сынъ же Махамета султана Амуратъ, меншии же Мустофа, ему же греческый царь дастъ помощь, и нѣкиа страны на востоцѣ приатъ. Посылаетъ же на нь Амуратъ воиньство. Мустофа же изыде на брань из Никейскаго града и ту убиенъ бысть. И бысть царь восточным, и западным, и турком Амуратъ, и сего ради на греки брань дръжаше, яко брату его помощь даша, с деспотом же Стефаномъ велику любовъ сотвори.
Потом же деспот нача множае болѣти ногама своима. И призва нетиа своего Гурга, поставляет деспота всей Серпьской земли. По мале же и сам отходить сего свѣта, в лѣто 6935 нюня 19. Бысть же в той день къ Бѣлуграду гром страшенъ, яков же никогда не бысть, и тма по всей нашей странѣ, яко нощь мнѣти, и на захожении солнца мало просвѣтлися. Плакавше зѣло, положиша деспота у Бѣлаграда въ манастыри живоначалныя Троица и въ гробници, еже сам създа. <...>
| Предыдущая страница | К оглавлению | Следующая страница |