Александр Невский
 

10. Степенная книга. Предисловие, четвертая степень

Отепенная книга — один из самых знаменитых историко-литературных памятников XVI в., посвященный истории Российского государства. В ней история излагается по степеням (ступеням), которые ведут Россию к Богу. Предполагаемым автором является митрополит Московский Афанасий, создавший ее в начале 1560-х гг. (в то время он был протопопом московского Благовещенского собора и носил имя Андрей). Изложение русской истории доведено до 7068 (1560 г.). Публикация осуществляется по изданию: ПСРЛ. Т. 21. Ч. 1. Книга степенная царского родословия. Подг. текста П.Г. Васенко. СПб., 1908. С. 184—189.

Сказаніе о святымъ благочестіи Російскихъ началодержець и сѣмени ихъ святого и прочихъ

Книга степенна царскаго родословія, иже въ Рустей земли въ благочестіи просіявшихъ богоутверженныхъ скипетродержателей, иже бяху отъ Бога, яко райская древеса насаждени при исходищихъ водъ, и правовѣріемъ напаяеми, богоразуміемъ же и благодатію возрастаеми, и божественою славою осіяваеми явишася, яко садъ доброрасленъ и красенъ листвіемъ и благоцвѣтущъ; многоплоденъ же и зрѣлъ и благоуханія исполненъ, великъ же и высокверхъ и многочаднымъ рождіемъ, яко свѣтлозрачными вѣтми разширяемъ, богоугодными добродѣтельми преспѣваемъ. И мнози отъ корени и отъ вѣтвей многообразными подвиги, яко златыми степенми на небо восходную лѣствицу непоколеблему водрузиша, по ней же невозбраненъ къ Богу восходъ утвердиша себѣ же и сущимъ по нихъ. Имъ же бяше благочестію начальница богомудрая въ женахъ, святая и равноапостольная великая княгини Ольга, супружница Игорева Рюриковича, ея же торжественое слово въ начале преже оглавленія книги сея предложено суть.

Потомъ же преславнаго внука ея равнаго Апостоломъ, святого и блаженнаго царя и великаго князя Владимера и семени его праведнаго, иже мнози отъ нихъ мужеска полу и женска Богу угодиша въ благоденственомъ державствѣ, въ супружествѣ живуще и во благородномъ многочадіи; овіи же безсупружествомъ, чистотою, иночествомъ и мученіемъ за Христа, и на бранехъ храбростію, и благодарнымъ терпѣніемъ восплененіихъ, въ нужахъ, и вь юзахъ, и въ темницахъ, и въ межеусобныхъ крамолахъ озлобленіемъ и лишеніемъ очію и заточеніемъ, и ини же самоволною нищетою и странствіемъ и богомудростнымъ претворенія уродствомъ, и бездомъствіемъ во отечествіихъ и въ чюжеземствіихъ и прочими добродѣтельми паче песка умножишася, и никтоже можетъ исчести ихъ. Чюдныя же повѣсти, ихъ же елико возмогохомъ отчасти изообрѣсти, и сія здѣ въ книзе сей степенми разчинены суть, и граньми обьявлены, и главами съ титлами сказуеми; ими же возможно всяку повѣсть, въ книзѣ сей реченну, немедлено обрѣсти; идѣже и святѣйшихъ митрополитъ всеа Русіи имена вчинена суть, и о прочихъ святыхъ, и знаменія, иже съ небеси отъ Бога. О немъ же и начало книги сея речется и прочая...

Четвертый степень, въ немъ же главъ 9 и три митрополиты: Никифоръ, Никита, Михаилъ и грань 4

О Боговѣнчаномъ царѣ и великомъ князе Владимере Всеволодичи Манамасѣ.

Глава 1. Лѣпо же убо не преити молчаніемъ но должьно есть воспомянути въ малѣ нѣчьто о боговѣнчанномъ царѣ и самодержцѣ, о великомъ князе Владимере Всеволодичи Манамасѣ, и о многихъ знаменіихъ и чюдесѣхъ, иже во дни его быша, и ослепленномъ сродницѣ его Василькѣ и о сугубомъ знаменіи крестномъ и о державствующихъ въ лѣта его и о преславномъ его, иже на царство, вѣньчаніи и о совершеніи добродѣтельнаго житія его. Сей убо Богомъ вѣньчанный царь и великій князь Владимеръ, сынъ Всеволожь Ярославичя, правнукъ блаженнаго самодержьца Владимера, отъ него же бысть четвертый степень, пресловущій въ Руси царскимъ именованіемъ, иже по матери дѣднимъ званіемъ именуемъ есть Манамахъ. И сего кто доволенъ есть подробну изрещи благородную доблесть и крѣпкодушьное мужьство и благоразумное разсуженіе, наипаче же не землеплѣнное властолюбіе, но высокожеланное смиренномудріе? Внегда бо христолюбивому отьцу его, Всеволоду Ярославичю, зельно изнемогающу уже при смерти, и тогда призва къ себѣ отѣ Чернигова сего благородьнѣйшаго сына, Владимера Манамаха, и, даровавъ ему благословеніе, къ Богу отиде. Владимеръ же тогда все отьческое достояніе въ руку своею имѣя и ни мало не вознесеся мыслію начальственаго властолюбія, но самовольнѣ уступая Кіевскаго самодержанія, и къ брату своему нелицемѣрную любовь предлагаше и паче себя начальствомъ почитая того, яко да завистію не уязвляется и враждебныя брани не составляет Призываетъ же отъ Турова брата си изъ двуродныхъ Свѣтополка Изяславича, внука Ярославля Владимерича, и на того честь и старѣйшинство великого княженія возлагаетъ и все отьческое достояніе, иже въ Кіевѣ, поручаетъ ему; самъ же въ Черниговъ отходитъ, и тамо господьствуя и прочая снабдѣвая.

Глава 2. Окнязѣ Василькѣ ослепленном и о чюдеси животворящего креста.

Не по мнозѣхъ же лѣтехъ навѣтомъ вражіимъ Свѣтополкъ Изяславичь и Давидъ Игоревичѣ, внукъ Ярославль, завистнымъ оклеветаніемъ призвавше къ себѣ лстивно, и сугубо нужно узами обложиста сродника своего, князя Василька, иже бысть сынъ Ростиславль, внукъ Владимера Новогородскаго Ярославича Великаго. По сихъ же повелѣста и очію лишити его. Онъ же возопи къ Господу, съ плачемъ веліимъ глаголя. Молитва. «Господи Исусе Христе, Сыне Божій! Ты вѣси, яко ничьто же зла не сотворихъ братьи моей, ни изменихъ имъ ни въ чемъ же и не вѣмъ, чьто ради много болѣзненую сію страсть нынѣ воспріемлю отъ нихъ, еще же и очнаго свѣта лишаютъ мя. И буди воля Твоя, Господи Боже мой, и не остави мене до коньца погибнути, яко милость и истинна Твоя пребываетъ въ вѣки». И по молитвѣ четырми мужи едва поверженъ бысть въ знакъ на коврѣ. И двема цькама наложиша его, и немилостивно ножемъ выняста очеса его, и заточиша его во градъ Владимеръ. Слышавъ же сіе, Владимеръ Манамахъ ужасеся и плакася горько и посла ко прочіимъ братіямъ и совѣтъ дая имъ, отмьстити хотя ослепленіе Васильково п враждебное братоненавидѣніе и неповинное кровопролитіе утолити. Кіевстіи же людіе, слышаще сіе, и умолиста митрополита Николу и великую княгиню Всеволожу, яко да идуть ко Владимеру еже съ мольбою утѣшати его, да утолить брань. Они же идоша и много молиша его. Благосердый же Владимеръ много плакася о таковѣй враждѣ, яко преже сего не сотворися таково злое ослепленіе въ Руси, но обаче преклонися на мольбу княгинину: чьтяше бо ю, яко матерь, и не преслушаяшася ея ни въ чемъ же. Тако же и святительскій санъ и тогдашьняго митроиолита Николу чьтяше вельми, и не преслушаяся его, яко отьца. И пріемъ мольбу ихъ, и миръ сотвориша, и Василько свободь бысть и сѣде въ Тербовли, и крестомъ честнымъ не единою утвержахуся, и паки брань межу ими воздвизашеся. Василько же свое ослепленіе отмьщаше и, миръ сотворше паки, Свѣтополкъ Изяславичь прогна Давида Игоревича, яко его навѣтомъ ослепленіе Васильково бысть. Тогда же ко Владимеру Манамаху и къ Васильку ослепленному совершенъ миръ и любовь по крестному увѣренію имѣя, въ сердцы же лукавная мысля, надѣяся на множество воинества своего, и преступи крестное увѣреніе и бранію подвижеся Свѣтополкъ на Владимера и Василька, и сраженію бывшу.

Чюдо животворящаго креста. Василько же очію лишенный вместо оружія вземъ честный крестъ и возвыси его выспрь и глагола ко Свѣтополку: «Сего еси креста целовалъ; и сего божественаго креста непобедимая сила да одолѣетъ коварству твоему». Мнози же людіе видѣша чюдо преславно, яко той божественый крестъ вельми возвысися надъ Василькомъ и на самомъ облаце видѣнъ бысть. И абіе одолѣша Свѣтополку и не гнашася по немъ: не жадаху бо многаго кровопролитія, не довлѣетъ имъ преславнымъ крестоявленіемъ Божіе поможете. И сташа на межахъ, веліе благодареніе всылающе Богу, и потомъ снидошася братія: Свѣтополкъ Изяславичь, Владимеръ Всеволодичь Манамахъ, и Давидъ и Олегъ Свѣтославичи, и устроиша завѣтъ непремѣненъ посреди себе, еже не вступатися въ чюжей предѣлъ никому же. И тако утвердивше, разыдошася; и бысть въ нихъ непоколебимъ миръ и любовь и соединеніе.

Начало церкви Смоленьстей и епископіи. И пріде Владимеръ Манамахъ во Смоленьскъ и воздвиже церковь пречестную во имя Пречистыя Богоматери, идѣже тогда и епископію устрой.

Глава 3. Преславное знаменіе въ Рустей земли на небеси явльшагося честнаго и животворящаго креста Господн я. Во время же мирнаго ихъ и любовнаго соединенія явися на небеси знаменіе чюдно и преславно мѣсяца февраля въ 4 день и въ 5 день и въ 6 день: во вся сія три дни и три нощи непремѣнно стояше солнце въ кругу, а посреди круга крестѣ посреди же креста солнце, и внѣ круга надъ солнцемъ оба полы два солнца, едино отъ другаго кромѣ рогома на сѣверъ. Таково же знаменіе и тѣмъ же образомъ и въ лунѣ бысть. Сіе же знаменіе то и солнечнаго сіянія тричислеными деньми вкупѣ и тричислеными нощьми проявляя непремѣнную благодать православною вѣрою сіяющихъ во Святую Троицу, иже въ Рустей земли, креста же божественаго свѣтозарный образъ проявляетъ богомудрымъ благочестія держателемъ съ небеси непобедимую благодать божественыя силы и свѣтлопобѣдительное одолѣніе на вся видимыя и невидимыя враги, яко же древле Исусу Наввину дарова Богъ побѣду на противныя и солнцу заповѣда стояти на едино время и во единъ день, доньдеже Исусъ победи супостаты. Здѣ же нынѣ заповѣда Богъ трисіянному сему на небеси знаменію честнаго и животворящаго креста Господня явитися въ тріехъ солнцыхъ, тако же и въ лунѣ три дни и три нощи непремѣнно сіяти ради любовнаго въ боголюбивыхъ самодержателехь соединенія, наипаче же вѣры ради и незлобиваго нрава богомудраго Владимера Манамаха, ему же и братіи его преже сего и потомъ дарова Богъ многи побѣды на безбожьныя Половцы. Того же лѣта мѣсяца декабря 6 пріиде отъ Царяграда митрополитъ Никифоръ и возведенъ бысть на престолъ Рускія митрополія того же мѣсяца декабря 18.

Глава 4. Чюдо о побѣде на Половцы анггельскимъ пособіемъ. Въ третіе же лѣто по явленіи солнцесіяннаго на небеси крестнаго знаменія, о немъ же выше речено, воеваху Половцы въ Рускихъ предѣлехъ округъ Заречьска и помощію Всесильнаго Бога побежени быша отъ Рускихъ князей, Владимеръ. По сихъ же достохвальный Владимеръ Манамахъ, Богомъ подвизаемъ, подвиже собою братью свою на иноплеменныя Половцы, и пріидоша ко граду ихъ Шаруканю. Половцы же выидоша изъ града, носяще рыби и вино, кланяхуся и покаряхуся. На утрія же брань составиша и паки побежени быша. По тріехъ же днехъ собрашася ихъ многое множество, тьмы темъ, и оступиша округь Рускихъ полковъ, яко пожрети ихъ хотяше. И сразишася полцы, и тресновенію бывшу яко отъ грома, и падаху обои. Владимеръ. Владимеръ же призва Бога на помощь и своими полки приближися, тако же и Давидъ; и посла Богъ анггелы своя въ помощъ имъ, и возрѣвше Половцы и вдаша плещи свои, обратившеся на побѣгь. Анггельская помощъ. Падаху предъ полкомъ Владимеровымъ, невидимо убиваеми Божіми анггелы, еже и мнози человѣцы видѣша, яко главы Половецькаго воинества невидимо усекаеми, на землю падаху. И тако Божіимъ пособіемъ до коньца победиша ихъ и все богатьство ихъ взяша и многихъ самихъ Половець живыхъ поимаша, ихъ же и вопрашаху: «Како вскоре побегосте, собравшеся васъ неисчетное множество»? Они же глаголаху: «Кто можеть съ вами братися? Видѣхомъ бо верху васъ полки многіе, ѣздяща вельми вооружены и необычьною свѣтлостію сіяюща, страшьно же есть и зрѣти на нихъ; и разумѣхомъ, яко сіи суть отъ Бога послани и вамъ христіяномъ помогаху». Тако помогаше Богъ любящимъ Его и творящимъ волю Его; тако соблюдаше въ братолюбіи пребывающихъ, такова преславна знаменія являя, прославляя благочестиво царствующихъ.

Знаменіе въ Печерскомъ монастыри. Тогда же видѣша и въ Печерскомъ монастыри, столпъ огненъ на каменей трапезницы стояше. Та же приступи надъ церковь, а оттуду къ Городцу Врадасыни: тамо бо бяше тогда Владимеръ Манамахъ.

Глава 5. Преставленіе великого князя Свѣтополка Изяславича, и о княгине его. По сихъ же лѣту единому мимошедшу, преставися отъ житія сего великиій князь Михаилъ, рекомый Свѣтополкъ Изяславичь, внукъ Ярослава Владимерича, мѣсяца марта 19 день; и положиша его въ церкви святого архистратига Михаила, юже бѣ самъ создалъ. Княгини же его много богатьство раздал монастыремъ и ерѣемъ и убогой чади; дивляху же ся ему вси люди, яко такоя милостыни никто же не сотвори никогда же.

Глава 6. Самодержаніе Владимерово. Великій же князь Владимеръ Всеводичь Манамахъ вниде въ Кіевъ мѣсяца марта 20 и благочестно пріятъ отьческое наслѣдіе Рускія хоругви скипетродержаніе. Сынъ же его старѣйшій Мьстиславъ тогда господьствуя въ Великомъ Новѣграде и на своемъ дворѣ постави церковь камену святого Николы и Новъградъ больши перваго заложи.

Глава 7. Принесеніе честныхъ мощей святыхъ праведныхъ страстотерпецъ, Бориса и Глеба. Вышеграде же повелѣніемъ христолюбиваго самодержьца Владимера Манамаха поставлена бысть церковь камена святого Василія, въ ню же преславное и многочюдесное бысть пренесеніе честныхъ мощей святыхъ праведныхъ страстотерпецъ, боголюбивыхъ князей самобратныхъ Бориса и Глѣба. Къ симъ же сродникомъ своима самодержець Владимеръ вѣру велію имѣя и во именахъ святая церковь прекрасну постави на Альтѣ; идѣже братоубійственою кровію вѣньчася блаженный Борись.

Глава 8. Умильныя къ Богу Владимеровы слезы, и како боговѣнчанный царь наречеся отъ греческаго царствія. Боголюбивый же Владимеръ тако отъ Бога сподобися пріяти богатодаровитую благодать душевнаго умиленія, яко егда вхожаше въ церковь или когда на пѣніи предстояще, и тогда непрестанныя источьники слезъ оть очію изливахуся. И всегда со слезами мольбы своя приношаше Господеви Богу нашему. Человѣколюбивый же Богъ вся, яже на пользу, прошенія его всегда и вездѣ исполняше ему. Яко же онъ Бога возлюби, и всею душею своею и всѣмъ сердцемъ своимъ и всею мыслію своею и прочими благими дѣлы и обычаи преспевая за Рускую же землю благосовѣтіемъ и безъ лѣности многъ трудъ полагая, тако и Богъ сихъ ради добрыхъ подвигь его проудобрено свыше славою и честію вѣнча его и царскимъ именованіемъ паче инѣхъ царствующихъ прослави его. И всюду прослы въ храбрости и побѣдахъ, еже всѣмъ странамъ имени его трепетати, и во всѣхъ земляхъ изыде слухъ его. Его же ради мужества и Греческаго царя Костянтина Манамаха діядиму и венець и крестъ Животворящаго Древа пріемъ и порамьницу царскую и крабійцу сердоличьную, изъ нея же веселяшеся иногда Августь, Кесарь Римскій, и чѣпь златую Аравійскаго злата и иныя многія царскія почести въ дарѣхъ пріятъ мужества ради своего и благочестія. И не просто рещи таковому дарованію не отъ человѣкъ, но Божіимъ неизреченнымъ судьбамъ претворяюще и преводяще славу Греческаго царства на Російскаго царя. Вѣньчанъ же бысть тогда въ Кіевѣ тѣмъ царскимъ веньцемъ во святей велицей соборнѣй и апостольстѣй церкви отъ святѣйшаго Неофита, митрополита Ефескаго и отъ прочихъ святитель Митулинскаго и Милитійскаго, вкупѣ съ митрополитомъ пришедшихъ отъ Царяграда, и оттоле боговѣньчанный царь нарицашеся въ Російскомъ царствіи. Во оно же время пресвященный митрополитъ всеа Русіи Никифоръ житія пременися, въ него же мѣсто пріиде изъ Царяграда Никита, митрополитъ Кіеву и всеа Русіи.

Глава 9. Побѣды на Нѣмцы и на Половцы и на Литву и на Емь и на Болгары и преставленіе Владимерово. Боговѣнчанный же царь и великій князь Владимеръ Манамахъ, царствуя благоденствено, всяко благочестіе исправляя, своихъ же сродниковъ и братію не тако страхомъ, яко же любовно снабдѣвая и межуусобную брань всяческіи утоляя и округняя страны многообразие умиряя, овогда самъ подвизашеся и укротевая супротивныхъ иногда же сыньми своими.

Мьстиславъ покори Чюдцу. Яко же старѣйшій сынъ его Мьстиславъ шедъ съ Новогородцы и Чюдскую землю смири и дань на нихъ возложь и градъ ихъ Медвѣжью главу взятъ. На Половцы побѣда и на Литву. И на поганыя Половцы мужественѣ за Рускую землю подвизался, яко же и отецъ его, и одолевая имъ и отъ земля Рускія отгоняя, и не токмо за Донъ загна ихъ, но и за Волгу, и Литву одолѣ. Святъ. Сего же Мьстислава сынъ Всеволодъ, внукъ Владимерь Пьсковскій, иже нынѣ чюдотворець, Емь победи. Долгорукіи. Сего же Владимера Манамаха сынъ наслѣдникъ, преславный во храбрости Георгій Долгорукій, посланъ отьцемъ на Болгары Воложьскія и Камскія и шедъ одолѣ имъ. Тако Всесильный Богъ великую свою милость изливаетъ на боящихся Его и творящихъ волю Его святую и Своимъ благоутробіемъ вся благая и полезная устраяетъ имъ. Добре бо строящимъ земная, даруются имъ и небесная, яко же рече апостолъ: «Любящимъ Бога все поспѣвается и въ благо: вѣрующему бо вся возможна». Тако и сему благочестія рачителю, богомудрому самодержцу боговѣньчанному царю Владимеру Манамаху Преблагій Богъ Своимъ неизреченнымъ промысломъ и премногимъ милосердіемъ таково поспѣшество и укрепленіе дарова. Тако возвеличи Господь Своея божественыя силы дѣло и великую милость въ родѣ праведномъ, иже въ Рустей земли благочестіемъ державствующихъ отъ святого племени перваго блаженнаго Владимера, яко же и сей пресловущій Манамахъ Владимеръ украшенъ бывъ добрыми нравы и прослы въ побѣдахъ за Рускую землю, его же имени вся страны трепетаху. 8 сыновъ. И ему же бяху сыновъ 8: Мьстиславъ, Изяславъ, Свѣтополкъ, Ярополкъ, Вячеславъ, Романъ, Юрьи, Андрей. И тако благочестно поживе, земнымъ царствомъ въ Руси владый, наипаче же всего желая и Небесное Царство получити, всегда его во умиленіи препровожая дни своя и у любовныя ему церкви, иже на Альтѣ святыхъ мученикъ Бориса и Глѣба, пребывая, жизнь свою богоугодно сконьча, содержай скипетро Рускаго царствія лѣтъ 13. Всѣхъ же лѣтъ поживе 73 и съ миромъ къ Богу отиде мѣсяца маія 19. Честное же его тѣло принесено бысть въ Кіевъ и съ подобающею честно положено бысть во святѣй церкви Премудрости Божія Слова. Лѣту же единому минувшу, и митрополитъ Никита къ Богу отиде и по немъ бысть Михаилъ митрополитъ всеа Русіи.

Четвертый степень прешедъ, пятый степень начинается, иже есть начало Московскому царствію.

Предыдущая страница К оглавлению Следующая страница

 
© 2004—2024 Сергей и Алексей Копаевы. Заимствование материалов допускается только со ссылкой на данный сайт. Яндекс.Метрика